Attila

Dr Attila († 453) isch vo 434 (as Mitherrscher zsämme mit sim Brueder Bleda) bzw. 444/45 (as Eläiherrscher) bis zu sim Dood „Köönig“ (rex) vom Chriegerverband vo de Hunne gsi. S Zentrum vo sim Machtberiich isch s Gebiet vom hütige Ungarn gsi, wo d Hunne im 5. Joorhundert e churzlääbigs Riich gha häi, wo under em Attila si grössti Macht erläbt het, aber scho churz noch sim Dood wider zsämmebroche isch.

Dr Attila het widerhoolt Chriegszüüg gmacht, und isch drbii vilmol seer hert mit de Lüt umgange. Er het sich zerst gege Ostroom gwändet, noch 451/52 aber vor allem gege Westroom. Er het mit bäide Däil vom Riich diplomaatischi Kontakt ghaa, und isch vor allem druf us gsi, möögligst hoochi Dributzaalige duurezsetze. Die het er brucht, zum si Vilvölkerriich zsämmezheebe. D Römer iirersits si an möögligst stabiilen und ruejige Verheltniss im Barbaricum ääne an dr Gränze intressiert gsi. Für die röömisch-hunnische Kontakt in deere Zit stoot mit em Gschichtswärk vom Priskos, wo no Fragmänt drvo existiere, e wichdigi Kwelle zur Verfüegig.

As legendääri Figuur Köönig Etzel het dr Attila in e Hufe middelalterlige Wärk witergläbt, wie im Nibelungelied und dr Dietrichepik.